以空靈魔幻嘅北歐電子民謠吸引接近30億串流點播，挪威另類流行唱作歌手 AURORA 將於2025年2月24日首度訪港。

音域多變自成一格嘅奇幻女聲 + 同時駕馭民謠與電子音樂風格 + 舞台上古靈精怪嘅肢體動作 + 無拘無束嘅戲劇化表情 + 令人印象深刻嘅服裝穿搭，加上天生嘅北歐人氣質 —— 初初接觸到 AURORA 時，好容易會聯想起冰島國寶歌姬 Björk。

童年喺沿海城市渡過，於挪威的森林長大，AURORA 自6歲開始養成寫歌嘅興趣以來，大自然一直係佢重要嘅靈感女神，至今依然有到森林散心，飲紅酒與動物聊天嘅習慣。19歲推出處女大碟《All My Demons Greeting Me As a Friend》融合北歐傳統民謠、synth-pop、電子音樂等曲種，收錄令佢喺全世界初露鋒芒嘅名曲〈Runaway〉，更因為觸動人心嘅歌詞，而獲邀喺2015年諾貝爾和平獎頒獎上現場演唱，此曲至今累積超過九億串流點播，大紅人 Billie Eillish 就曾經強調〈Runaway〉係啟蒙佢開始創作嘅重要作品之一。

2019年，AURORA 再因為參與演唱《魔雪奇緣 2》 主題曲〈Into The Unknown〉而國際性爆紅，樂迷紛紛被佢一把既能魔幻飄渺又能雪崩澎湃，無負其名「極光」之意嘅歌聲所震撼，快速成為挪威音樂代表。及後再推出新碟《The Gods We Can Touch》，從希臘神話取材，透過普羅米修斯、酒神等15位神衹嘅缺陷，探討人性與宗教，亦喺〈Cure For Me〉表現出佢對電音節奏嘅掌握，喺 Metacritic 上得到81分綜合好評。

然而呢位被形容為異世界精靈都不為過嘅唱作者，並不只有文藝知性一面，其純粹、原始、直接宣洩情感演唱方式，令佢喺2017年收到英國電音霸王 The Chemical Brothers 相邀合作，分別喺〈Eve of Destruction〉、〈The Universe Sent Me〉等曲獻聲，與成員之一 Tom Rowlands 結成忘年之交（AURORA 第一次往 Rowlands 家中作客時，就因為喺森林散步散咗5個鐘嚇親人以為佢失蹤），而對方亦禮尚往來，喺 AURORA 嘅新歌〈My Body Is Not Mine〉中編奏合成器以及鼓機部分。

喺為《The Gods We Can Touch》進行巡演期間，興趣多多嘅 AURORA 開始鑽研人體解剖學，希望從生物層面去了解「人心」到底係咩一回事，並以此連結地球生態、社會結構、心靈成長等主題，最終完成今年推出嘅第四張個人大碟《What Happened to the Heart?》。除咗剛提到嘅〈My Body Is Not Mine〉外，亦收錄〈Your Blood〉、〈To Be Alright〉、〈Starvation〉等先行單曲，係一張適合由頭聽到尾嘅上佳專輯。2025年2月24日，呢位無論流行與獨立樂迷間同樣大受歡迎嘅新生代北歐天后，將於亞洲國際博覽館5 號展館(Hall 5)作首次香港公演，包保係一場你十年後都可以攞出嚟回帶威威嘅精彩演出！